ՉԻ ԿԱՐՈՂ ԼԻՆԵԼ ԹԱՔՈՒՆ ՎԵՐԱԲՆԱԿԵՑՈՒՄ

[groul]

18:31 07/06/2007

«ՉԻ ԿԱՐՈՂ ԼԻՆԵԼ ԹԱՔՈՒՆ ՎԵՐԱԲՆԱԿԵՑՈՒՄ»

«Անհեթեթություն է այսօր խոսել հողերի վերադարձման մասին և ոչ ոք չի ստորագրի նման փաստաթուղթ»,-այսօր «Ուրբաթ» ակումբում ազատագրված տարածքների վերաբերյալ քննարկման ժամանակ նշեց «Հետք» էլեկտրոնային կայքի խմբագիր Էդիկ Բաղդասարյանը: Նրա կարծիքով, «չի կարող լինել թաքուն վերաբնակեցում: Աշխարհը թափանցիկ է, և ի՞նչ է նշանակում այնպես անել, որ մարդիկ չիմանան, վերաբնակեցում է տեղի ունենում: Այդպիսի բան հնարավոր չէ»: Նրա կարծիքով, պետք է հստակ հայտարարել, որ վերաբնակեցնում ենք այդ տարածքները և կոնկրետ նշել, թե որ գյուղերը երբ են բնակեցվելու: Ջրի ու հոսանքի հարցերը նույնպես, ըստ նրա, պետք է լուծվեն այդ համատեքստում:

«Ազատագրված տարածքների նկատմամբ իշխանությունները պետք է ունենան բիզնես ծրագիր և գործարարներին նույնպես ներգրավեն այդ աշխատանքներում»,-համոզված է Է. Բաղդասարյանը: Նրա խոսքով, այսօր այդ ուղղությամբ ամենամեծ գործը անում են սփյուտռքահայերը: «ԼՂՀ նախագահ Ղուկասյանը երևի չգիտի, որ Թուֆենկյանը այնտեղ խաղողի այգիներ է վերականգնում, ՀՕՄ-ը մանկապարտեզ է կառուցում, Մոնթե Մելքոնյանը երիտաարդական կենտրոն է կառուցել»,-ասաց Է. Բաղդասարյանը, նշելով, որ նման եզրահանգման ինքը հանգել է այն պատճառով, որ Ա. Ղուկասյանը շնորհակալական խոսքերի փոխարեն մեղադրանքներ է ներկայացնում Սփյուռքին:

http://www.panorama.am/am/politics/2007/06/07/qashatagh/

[groul]

Ղարաբաղի պաշտոնյաներն անգամ Քաշաթաղի տեղը չգիտեն

11:17 Yerevan | 7:17 GMT | Friday 8 June 2007

Թագուհի Հակոբյան

Լեռնային Ղարաբաղն ու ազատագրված տարածքները սովորաբար հիշատակվում են միայն դիվանագետների հանդիպումների ժամանակ եւ «դարից երկար» ձգվող բանակցությունների սեղանի շուրջ: Իսկ ինչպե՞ս է ապրում հայ մարդը, ի՞նչ հոգսեր ու խնդիրներ ունի նա` քչերին է հուզում:

«Հետաքննող լրագրողներ» ընկերակցության նախագահ, ծագումով ղարաբաղցի Էդիկ Բաղդասարյանը եւ «Դրոշակ» ամսագրի խմբագիր, դաշնակցական Կարեն Խանլարյանը երեկ «Ուրբաթ» ակումբում հայտարարեցին, որ չկա ազատագրված տարածքները վերաբնակեցնելու պետական ծրագիր: Էդիկ Բաղդասարյանը, որը շրջագայել է ազատագրված տարածքներով եւ Լեռնային Ղարաբաղի բնակավայրերով, պատրաստել նրանց հիմնախնդիրների մասին մի շարք հրապարակումներ, համոզվել է, որ ղարաբաղցի շատ պաշտոնյաներ նույնիսկ չգիտեն Քաշաթաղի (Քաշաթաղի շրջանը ներառում է Ադրբեջանի նախկին երեք շրջանները` Լաչին, Զանգելան, Ղուբաթլի) գյուղերի տեղը, չեն այցելում այնտեղի բնակիչներին եւ անհաղորդ են նրանց հոգսերին:

«Ղարաբաղում մի պատգամավոր կա` Վահրամ Աթանեսյան անունով, որը պարբերաբար ակտիվանում է: Քաշաթաղի հյուսիսային գյուղերից պատգամավոր է ընտրվել, սակայն ընտրվելուց հետո չի եղել Քաշաթաղում», - հայտարարեց Էդիկ Բաղդասարյանը: Նա նշեց նաեւ, որ իր հրապարակումներն ավելի շատ արձագանք են գտել սփյուռքում, քան Հայաստանում: Սփյուռքում ստեղծվել է Քաշաթաղի աջակցության կոալիցիա, որի շնորհիվ վերականգնվել են երեխաներին տրվող արտոնությունները, յուրաքանչյուր շնչին տրվող հոսանքի 60 կվտ-ին կտրվի փոխհատուցում, Քաշաթաղի հիվանդանոցում բուժվելը դարձել է անվճար, որոշ գյուղերում սկսել են աշխատել ավտոբուսներ: Էդիկ Բաղդասարյանին հետաքրքրում էր, թե որքանով է իշխանության մաս կազմող ՀՅԴ-ն, որը հայդատականության ջատագովն է, հետամուտ վերաբնակեցման ծրագրին: Կարեն Խանլարյանը արձագանքեց, որ վերաբնակեցումը միշտ եղել է ՀՅԴ-ի ուշադրության կենտրոնում, սակայն` «ինչպե՞ս կարող է մարդը վերաբնակվել մի տարածքում, որի` Ադրբեջանին հանձնելու հարցը քննարկվում է բանակցությունների ժամանակ»: Է.Բաղդասարյանն անհեթեթ է համարում տարածքների հանձնման մասին ցանկացած խոսակցություն:

«Նման փաստաթուղթ չի ստորագրի որեւէ մեկը: Դա կլինի դատավճիռ ցանկացած ստորագրողի համար», - համոզված է նա: Եւ այս համոզմունքն ունեցող լրագրողին անհասկանալի է մնացել պահանջատեր Դաշնակցության կեցվածքը հատկապես նախընտրական շրջանում, երբ ոչ մի խոսք չեն հնչեցրել ազատագրված տարածքների մասին: Էդիկ Բաղդասարյանը կարծում է, որ ՀՀ նորընտիր ԱԺ-ի պատգամավորներին պետք է էքսկուրսիա տանել Քաշաթաղ, որպեսզի նրանք գոնե իմանան Քաշաթաղի տեղը, քանի որ իշխող կուսակցություններից մեկի լիդերը չգիտի նույնիսկ, թե ինչ է Քաշաթաղը եւ որտեղ է գտնվում այն: Իսկ Էդիկ Բաղդասարյանն ասում է, որ ազատագրված տարածքներում մի սերունդ է մեծանում, որը ծնվել եւ ողջ կյանքն ապրել է այդտեղ եւ բացարձակ տեղյակ չէ, որ ինչ-որ քեռիներ իր գյուղը հանձնելու մասին են մտածում: Լրագրող Էդիկ Բաղդասարյանը մեղավոր է համարում նաեւ լրագրողներին, որոնք անընդհատ զբաղված են քաղաքական ինտրիգներ լուսաբանելով եւ չեն անդրադառնում սովորական մարդկանց խնդիրներին, չեն գրում նույնիսկ Հայաստանի գյուղերի մասին, որոնք իրենց անմխիթար վիճակով չեն տարբերվում Ղարաբաղի գյուղերից:

http://zhamanak.com/article/6457/